Арсеннинг ҳикояси

Арсеннинг юраги операция қилинганида у уч ёшлик гўдак эди. Болажон туғилганидан кўп вақт ўтмай, шифокорлар унда мураккаб юрак нуқсонини аниқлашган. Бу хабар оила аъзолари учун катта зарба бўлиб, Арсеннинг ота-онаси ўғлининг ҳаётини сақлаб қолиш мақсадида қўлларидан келган барча ҳаракатни қилиб, ёрдам излашни бошладилар.

2017 йил октябрь ойида, Лола Каримова-Тилляеванинг «Sen Yolg'iz Emassan» Фонди кўмагида Арсенга франциялик кардиожарроҳ Оливье Барон томонидан очиқ юрак операцияси бажарилди. "Операциядан аввал Арсенда жуда кучли вазн етишмаслиги кузатилар эди. Жарроҳликдан сўнг эса у анча бўйига ўсди, вазни ҳам оғирлашиб қолди. Кардиожарроҳ ўғлимизга мутлақо соғлом инсон сифатида муносабатда бўлишимизни айтганида, бу сўзларни эшитиб қалбим чинакам таскин топди", - дейди Халитова Роза, Арсеннинг онаси.

"Sen Yolg'iz Emassan" Фондининг молиявий кўмаги билан шу кунга қадар франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига 120дан ортиқ мураккаб юрак операциялари бажарилди, улардан 21 таси Франциянинг Нант шаҳридаги клиникада амалга оширилди.