Азизанинг ҳикояси

Абдумажитова Азиза туғма юрак нуқсони билан дунёга келган. Қизалоқнинг аҳволи оғирлиги сабабли у тез-тез реанимация бўлимига ётқизилар эди. Ўткир нафас етишмовчилиги туфайли, Азиза ойига 3-4 марта касалхонада даволанишига тўғри келар эди. Ҳаётини сақлаб қолиш учун унга мураккаб операция зарур бўлган.

Азизанинг оиласи Лола Каримова-Тилляеванинг «Sen Yolg'iz Emassan» Фондига мурожаат қилиб, ушбу Фонднинг молиявий кўмаги билан 2018 йилнинг июль ойида қизалоқ онаси билан Францияга жўнатилади ва у ерда кардиожарроҳ Оливье Барон томонидан Азизанинг юраги операция қилинади.

Кўп-соатлик жарроҳлик мувафаққиятли ўтди ва Нант шаҳридаги болалар шифохонасида бир ой давом этган муолажадан сўнг, Азиза соғайиб Ўзбекистонга қайтди. Яқинда Азиза 5 ёшга киради ва жуда кўнгли очиқ, ақлли қиз бўлиб катта бўляпти. У келажакда шифокор бўлиб одамларнинг ҳаётини сақлаб қолишни орзу қилади.

"Sen Yolg'iz Emassan" Фондининг молиявий кўмаги билан шу кунга қадар франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига 110дан ортиқ мураккаб юрак операциялари бажарилди, улардан 21 таси Франциянинг Нант шаҳридаги клиникада амалга оширилди.