Илҳомжоннинг ҳикояси

Илҳомжон яқинда икки ёшга тўлади. У Сурхондарё вилоятининг Қумқўрғон туманида яшайди. Беғубор ва хушчақчақ бу болакай юрак нуқсони билан дунёга келган. Касаллик туфайли бола жуда нимжон бўлиб, юра олмас, онаси уни доим қўлидан қўймай кўтариб юрар эди. Соғлиғини тиклаш учун кичкинтойни операция қилиш лозим эди.

2019 йил октябрь ойида Лола Каримова-Тилляеванинг "Sen Yolg'iz Emassan" Фонди кўмагида, франциялик кардиожарроҳлар томонидан Илҳомжон операция қилинди. Мураккаб юрак амалиёти натижасида боланинг аҳволи кундан-кунга яхшиланиб борди. У аста-секин юра бошлади, гапириш кўникмасига эга бўлди. Пироваридада, у юрак хасталигидан халос бўлди.

"Sen Yolg'iz Emassan" Фондининг молиявий кўмаги билан шу кунга қадар франциялик кардиожарроҳлар томонидан ўзбекистонлик эҳтиёжманд оила фарзандлари ва Меҳрибонлик уйи тарбияланувчиларига 120 дан ортиқ мураккаб юрак операциялари бажарилди. Тиббий амалиётларнинг 21 таси Франциянинг Нант шаҳридаги болалар клиникасида амалга оширилди.