Дилшодбекнинг ҳикояси

Шифокорлар Дилшодбекда туғма юрак нуқсонини аниқлашганда у олти ойлик гўдак эди. Иммунитетининг заифлашиши туфайли, болажон тез-тез шамоллаб қолар, касаллиги узоқ вақт давом этар эди. "Икки ёшгача биз касалхонадан чиқмадик. Борамиз, келамиз, уйга келсак йўталади, роса йиғлайди. Бола нотинч бўларди" - дея эслайди Дилшодбекнинг онаси, Сатторова Муножат.

Боланинг тузалиши учун операция зарур эди. Дилшодбекнинг оиласи Лола Каримова-Тилляеванинг "Sen Yolg'iz Emassan" Фондига ёрдам истаб мурожаат қилди. Ўтган йилнинг октябрь ойида Фонд таклифи билан Ўзбекистонга ташриф буюрган етакчи франциялик кардиожарроҳлар томонидан Дилшодбекнинг юраги операция қилинди. Операциядан сўнг, бола анча тетиклашиб, соғлиғи ижобий томонга ўзгара бошлади.

"Sen Yolg'iz Emassan" Фондининг молиявий кўмаги билан шу кунга қадар франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига 120дан ортиқ мураккаб юрак операциялари бажарилди, улардан 21 таси Франциянинг Нант шаҳридаги клиникада амалга оширилди.