Хумоюннинг ҳикояси

Хумоюн жуда нимжон бола бўлиб дунёга келган. Иштаҳаси ёмон, тенгдошларига нисбатан вазни ҳам анча ортда қолган эди. Болакай 3 ойлик бўлганида, унда шифокорлар юрак нуқсони ташҳисини аниқладилар. Ушбу касаллик туфайли кичкинтойни аҳволи кундан кунга оғирлашиб кетаётган эди. Сутни мустақил ютаолмаганлиги сабабли уни зонд ёрдамида овқатлантиришар эди.

2018 йил октябрь ойида Лола Каримова-Тилляеванинг "Sen Yolg’iz Emassan" Фонди кўмагида саккиз ойлик болажонга франциялик етакчи жарроҳлар томонидан очиқ юрак операцияси бажарилди. Энди Хумоюннинг аҳволи анча яхши, мустақил ютиб, овқатланмоқда, илк тишлари ҳам кўриниб қолди. Аста-секин кучга кириб, улғаймоқда, ҳаракатчан ва ҳуш-чақчақ бўлиб қолди.

"Sen Yolg'iz Emassan" Фондининг молиявий кўмаги билан 2015 йилдан бери франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига жами 90дан зиёд мураккаб юрак операциялари амалга оширилди, улардан 13таси Франциянинг Нант шаҳридаги клиникада бажарилди.